John 14

1A Bugba kwo to wun fyem. Fye ga Shekwoyi gaiciya, fya ga mi gaiciya njesun. 2Anyakun lo nmwa begye nmi dada puwa. Kwo to ɓo lo nlo num, mo gna fye ge nɓa lo mi zhin aba ba ga fye. 3Esa nu mi la pwo nɓa jeze ɓe ma ku fye lo ncei Nʼshe mi, ntuge aba n mi nyi fyehin fya sase ɓo. 4Fyei kpe zokwo lo nkwo lo aba nmi lo nyi.

5Toma wa ci ge, “Dagayi yi ta kpe aba lo nho lon, yi ɓa kpe zokwo nwuna?”

6Yesu wa gna wo ge, “Omi nu zhin zokwo, n gaiciya yi n wye-wyeyi. Zaho-zahoi ta mi wa lo Dada abam, sai wa e mi aba kpa. 7Fye ɓo gna fye kpe mi ye lo, fye kpe mi Dada ye lo, nsayi ye fye kpe wo ye lo, fyei ku wo gye wye.”

8Filibbus wa gna wo ge, “Dagayi wu yi Dada kwo ɓa yi kun.”

9Yesu wa gna wo ge, “Filibbus? Esa la mwa, yi kunsun na jeyi, Knihin nu zhin to hoi kpe Dada ye ma? Oza nwo ku mi gyewye, wo ku Dada gyewye. Knihin nu zhin hoi nya mi Dada ɓo njesun-a? 10Ho to ga gaiciya ge, mi dna lo n Dada, Dada njesun wo dna lo nmi m? Aɓeda nmi da nyi, Omi nya nu to m, ama Dada nu nwo dna n mi nyi. Wo nu zhin wo tnu-tnu. 11La gaiciya ga ge mi dna lo n Dada. Dada njesun n dna lo n mi. Kwo kwa ha gami gaiciya ntu aɓo wo-woyi ɓo nfye ku gye mi-i zhin nyi.

12“Behin-hin ma gna fye, Oza nwa ga mi gaiciya wo ɓa zhin aɓo wo-woyi shi ma zhin nyi, wo ɓa zhin aɓo ndu manya, ntu ge mi lo Dada ʼba nu. 13Fye nya Dada nyaho-nyahoi ɓo dna nmi eye, nɓa ga fye, ntu ge a la Dada tu n Nugun aba. 14Fye ɓa mi fya nya nyaho-nyahoi ɓo dna nmi eye mɓa zhin kwo.

Alkawali Zafun Gyi-gyi-yi Nya

15“Ndei fye ye mi lo, fye ɓa shi mi awyidna bwa. 16Nɓa gyi Dada wye wa ga fye bmazhinyi nwo ta shan fye fwam. 17Owo nu zhin Zafun Gaiciya nya. Wo ɓa kunsun nfyei har nyalo-nyalo. Anyi ta mi ɓa gwo wom, ntu ge ɓa ta gye wo wyem, ai gna ge ɓa kpe wo yem. Ama fye kpe wo ye lo ntu ge wo sase nfyei nu, woi ɓa dna nfye mi nu. 18Mi ta fwa fye ngye akuwyim, nɓa jeze ɓe da fye. 19Esa fyewyi nɓa fwa anyi, ama mi kunsun lo nfyei, ntu ge nɓo je wye-wyeyi bwa. Fye ɓa bwa wye-wyeyi ce ngye mi. 20Nwyihi-i fye ɓo kpe ge mi dna lo n Dada, efyehin ce nfi lo nmi, omihin njesun n dna lo n fye. 21Oza nwo zhin ɓo n mi ye, wo nu zhin mi yehi. Oza nwo ye mi, Dada nwohin wo ɓa ye wo. Mihin nɓa ye wo. Njesun ma wu zahi nwo ye mi nyi, mihin tukwo.”

22Yahuda (to ge Iskariyoti m) wa nya wo ge “Dagayi, ntu kni ɓei nu ha wu hohin tukwo n yi aba, to ha wu azajem ma?”

23Yesu wa dna wo ɓegbe wa ci ge, nɓa wu mihin tukwo nnaza ba nɓa ye mi nyi. Dada ɓa ye nɓai ce. Yi ɓa ɓe ya sase nɓai. 24Oza nwo taye mi m, wo ta vi mi ɓedam, ɓeda ye nmi da nyi Dada nya nu nwa tnu mi nyi. 25Mi gna fye aɓo deye, tunyi mi-i ye kunsun nfyei. 26Ama shi Dada ɓo tnu n Bmazhinyi, wato Zafun Gyi-gyi-yi wo ɓo wu fye aɓo vinya. Njesun wo ɓo pa fye aɓo n mi ku gna fye nyi.

27Kyauta asese-lafiya nyami la fwa nfye aba; Omi asese-lafiya nya nu nmi ga fye, kwo kakayi lo nnanyi nya. Ntu ce nu bugba to wun fyem, fyei to wo edna m. 28Fye pa aɓo n mi ku gna fye, mi fwa fye nu ama nɓa jeze ɓe da fye njesun. Ndei fe ye mi lo ɓehin-hin nya, fye ɓa dagma, ntu ge mi lo Dada aba nu nwo du mi nyi. 29Mi ku aɓeye pma fye gna, tunyi to ɓai zhin m, nabai shi ɓa ɓei zhin fye ɓo ga mi gaiciya.

30Mi to nsa yi lo, ma da ɓo nfyei m, ntu ge oza nukwoyi anyi nya ɓe lo, ama wo to n iko lo, tu nmi tukwo m. 31Ama, nɓa zhin ɓo Dada wa gna mi ge mi zhin. Ntu ge anyi ɓa kpe ge mi ye Dada lo. Fye kukala ya lo.